من زمان أوى كان عندى ميول قوية لممارسة الرياضة وانا فى فى الاعدادية لعبت كاراتيه بس مستمرتش كتير
بعدين لعبت مصارعة وتركتها بسبب عنفها بس اتعلمت منها حركات دفاعية منها ازاى احافظ على توازنى فى مواجهة اى خصم عشان لو دفعنى فى جسمى بايده اتحاشى السقوط على الارض
يعنى مثلا لو انت فى وضع هجوم او دفاع تجنب قفل رجليك لاتنين خلى واحدة قدام والتانية ورا جرب كده مع صاحبك وخليه يزقك مش هتقع على الأرض وجرب برضه ورجليك جنب بعض وخليه يدفعك بايديه الاتنين وقولى النتيجة ومش هتندم.
انا بقول الكلام ده ليه عشان نعرف فايدة الرياضة فى الحياة..
المهم لعبت بعد كده كمال اجسام رغم انى كنت مفعوص بس كان عندى عضلات بطن بارزة من غير تدريب وف اول اسبوع تدريب جه الكابتن بتاعى ولاحظ تقسيم عضلات البطن واثنى عليها فى وجود مساعده وده شجعنى للاستمرار فى التدريب لبعض الوقت..
وتركت التدريب بسبب الانشغال فى الدراسة ( الثانوية العامة) وكان دخل معايا فى نفس الوقت صديق اخر اكثر نحافة منى يعنى ممكن تقول عضم متعاص لحم..
نسيت انا كمال الاجسام واستمر صديقى فى التدريب رغم انه كان عبارة عن هيكل عظمى متحرك..
ومرت الايام والسنوات واذا بصديقى هذا يحصل على بطولة المحافظة وبعدها الجمهورية ثم حصوله على بطولات عربية ودولية وهو الآن مدرب عظيم فى إحدى الدول العربية
وعلى فكرة انا هقدمه لكم وهخليه يكتب عن تجربته وبطولاته ونصايحه للشباب المبتدئ فى التدريب وهيقدم لكم نصايحه الغذائية وحاجات كتير..
انا حبيت اقولكم الكلام ده عشان تعرفوا إن مفيش حاجة اسمها مستجيل لان اللى كان يشوف صديقى ده كان استحالة يتوقع انه يستمر فى التمرين او يحصل على بطولة على مستوى القرية او العزبة.
عشان كده عايزك تؤمن بنفسك وانه مفيش مستحيل المهم تشتغل على نفسك وانت مؤمن بقدراتك ويكون عندك هدف تحققه.. لانه هيتحقق فى يوم من الايام لو كان عندك اصرار
زوربا المصري

حكايتي عن النظارة الجاهزة اللى نصحنى بيها استاذ دكتور بس للاسف طلع طور وكانت النتيجة اصابتى بالتهاب فى العصب البصرى واشعة مقطعية وفيلم كبير، على فكرة انا رايح دلوقتى اعمل الاشعة فى مستشفى كتاركت.
هتقولى ياعم قول بقى حاضر هقولك الحكاية بص ياسيدى اول مرة اعمل كشف نظارة سالنى الدكتور بتلبس نظارة قلت له اه نظارة قراية وقتها كنت بلبس نظارة + ٢ الصينى دى ام ١٠ جنيه قبل التعويم سألت الدكتور مفيش خطورة منها قال لأ . ماشى ياعم الدكتور وفضلت ماشى على النظارات دى ولما مكنتش اشوف بمقاس ٢ كنت بشترى الاعلى يعنى ٢ ونص بعد كده دخلت على رقم ٣ وشغال يامعلم مع نفسى الدكتور قالي بقى مفيش ضرر طالما بتشوف بيها كويس.

المهم فى الفترة الاخيرة كنت بحس بالم فى عينى الشمال، وده حصل لانى كنت شغال مع نفسى شمال، حسب ارشادات الدكطوووور.. فجأة الالم بقى يزيد واتنقل من الشمال لليمين وبكده بقيت لعيب محترف او تقدر تقول ضرير بالصلاة على النبى.. قلت ياض مبدهاش روح اكشف نظر وغيرت الدكطور ورحت لمركز عيون وحظى وقع فى دكتور حاجة كده حلوة وأمورة كشفت لى نظر وفحص لقاع العين وراحت رامية عليا شوية اسئلة قلت عادى وجاوبتها ببساطة جدا.

واذ فجأة ( بصوت عبد الفتاح القصى)، رحمة الله عليه، تقولى الست الامورة بصوت رقيق وحنين ممكن بقى نعمل اشعة مقطعية على العصب البثرى ( تقصد البصرى طبعا)

قلت لها ممكن اوى ياقمر بس بينى وبينكم اتخضيت، وقلت لها ليه؟

قالتلى دونت وورى ( متخفش يعنى.. على طريقة محمد رضا) طبعا عملت نفسى ولا خايف ولا بتاع لإن قدامى قمر قمر بجد

المهم قالتلى يعنى كأنك هتتصور صورة هادية قلتلها طيب ٤ فى ٦ ولا ٦ فى ٩ ضحكت وضحكت تانى وانا كنت قاصد اضحكها عارفين ليه خمن كده انت وهو وهى عارفين ليه لانى كنت عايز اشوف سنانها وهى بتضحك :)

الخلاصة ( وانا واد خلاصة لاصة ومية مية) وده طبعا اعلان غير مدفوع الأجر.. الخلاصة انى اكتشفت ان النظارة الجاهزة دى اللى نصحنى بيها الدكطور سبب الأذى كله وهى السبب فى إلتهاب العصب البصرى مش كده وبس
لا كمان سببت لى ارتفاع فى ضغط العينين ( بالجوز ياحسين)

انا حبيت اقولكم التجربة دى عشان تخلوا بالكم من موضوع الظارات الجاهزة دى وللأسف دكتور الكلى اللى بتعالج عنده من الاملاح اكتشفت انه بيلبس نظارة من النوع الرخيص ده رغم انه استاذ جامعى بس بعد اللى حصل معايا ده انا لما اقابله الجلسة الجاية هقوله واحذره.

ياريت انت وهو وهى تكتبوا تجربتكم اى تجربة لان ممكن غيرك بستفيد منها او على الاقل تحذره من خطر ممكن يقع فيه والى لقاء فى تجربة اخرى وحكاية جديدة.

هتسألنى هو فى حد بيموت ويرجع تانى أفقولك أه ممكن، هتقولى ازاى؟

هقولك.. فى سنة 2005 ظهر عندى حالة انتفاخ فى البطن من الاجناب مكنتش عارف السبب وكنت بقول مجرد انتفاخ، بعد 6 شهور بدأت تظهر عندى اعراض جديدة، مش حمل طبعا، زى ما تلاقيك بتقول انت دلوقت.

كنت ساعات باخد كتافاست للسيطرة على الالم الشديد، لحد ما زادت الاعراض فى يوم وكانت لاتحتمل، وكنت وقتها ساكن لوحدى اتصلت بصديق وجه بعربيته ونقلنى لمستشفى احمد ماهر، أخدت حقنة مسكنة فى الاستقبال وروحت، وفى يوم وانا بزور طبيب صديق ( الدكتور أحمد سلامة) فى المستشفى لاحظ ان وشى مخطوف وأصفر سألنى مالك.

حكيت له قالى قوم أمشى مشيت سألنى شوية اسئلة عرفت منها أنه شاكك فى حاجة معينة خاصة لما سألنى عن أماكن الالم، ورغم ان صديقى أحمد سلامة كان مسؤل فى الوقت ده عن العناية المركزة ولا علاقة له بالجراحة الا انه عرف يشخص المرض بنظرة فاحصة لينقذنى من موت محقق، بقول الكلام ده لان فى دكتور جراحة فحصنى ولم يتوصل للتشخيص الحقيقى رغم اشارتى له عن اماكن الالم، المهم د.سلامة طلب منى اشعة تليفزيونية وطلع معايا الدكتور مصطفى التومى، باطنة، وفحصنى جيدا بعد ما قاله سلامة ده اشتباه فى زايدة، وهو ما أكدته الاشعة.

فورا تقرر دخولى العمليات لخطورة الموقف لان الزايدة تقريبا كانت انفجرت، بس أنا بطبيعتى مبخفش لا من الموت ولا العمليات، لدرجة وانا عندى 8 سنين دخلت العمليات لوحدى ومكنتش خايف، رغم شعورى بان الممرضات كانوا عايزين يطمنونى، المهم دخلت العمليات لوحدى من غير ما اقول لاى حد انى داخل اعمل عملية.

فجأة وأنا فى غرفتى رن الموبييل وبنتى بتسألنى بابا أنت فين ورديت عليها بشكل طبيعى جداً فى مستشفى احمد ماهر
-بتعمل ايه؟
-هعمل عملية الزايدة

البنت طبعاً اتخضت كانت رايحة النادى مع امها هوب اخدت تاكسى هى وامها وكانوا فوق راسى مخضوضين.

ايه يا جدعان محصلش حاجة دى حتة زايدة لا راحت ولا جت. بس بصراحة انا مكنتش مقدر خطورة الموقف.

دخلت العمليات ولانى مكنتش مستعد لبست جلبية مقطعة من بتوع المستشفى مفتوحة من الجنب زى بدلة الرقاصة كده، والكم مقطوع من عند الكوع كان شكلى كراكتر وانا داخل العمليات لقيت بنتى بتعيط كنت ساعتها خلف الباب الإزاز رحت واقف عاملها شوية حركات راقصة ولا البلياتشو ضحكت وقلتلها سلام.

على ترابيزة العمليات اخدت حقنة البنج المتينة فى الوريد بعد رفضى البنج النصفى فى الضهر، المهم عملية الزايدة دى اللى بتخلص فى 10 دقايق او ربع ساعة استمرت ساعتين وده اللى سرب الخوف لبنتى خارج غرفة العمليات ولما طلع الدكتور وسألته قالها ابوكى انكتب له عمر جديد كان ميت بنسبة 90%.

ولما سمعت الكلام ده منها سالته ايه الحكاية قالى لما فتحت الجرح الاعتيادى للزايدة ملقتهاش في مكانها اضطريت اوسع الجرح ملقتهاش برده لحد ما فتحت جرح حوالى 17 سم وادور على الزايدة مش لاقيها لمدة ساعتين لدرجة انى كنت هقفل الجرح واخرج لما زهقت !! وكنت هقرأ عليك الفاتحة قبل ما اخرج لانك كنت ميت ميت.

قلتله: الله يكرمك يا دكتور اصيل والله.
المهم قالى فضلت ادور ع الزايدة لحد ما لقيتها تحت الطحال فوق حاجة كده قريبة من القفص الصدرى بالصلاة على النبى.

المهم بعد كام يوم حسيت بالم فظيع طلعت اعمل اشعة تليفزيونية لقيت تجمع صديدى دموى الدكتورة نادية المختصة فى الاشعة اتخضت، رحت لدكتور جراح قالى نام على الترولى نمت. سالنى فى ايه المهم لقيته ماسك حاجة زى البنسة فى ايده حسيت انى نايم تحت ايد ميكانيكى ايه يادكتور هتعمل ايه قالى هنحاول ننزل الصديد فكرت انه هيفتح غزة او اتنين ويضغط ع الجرح ينزل الصديد والتجمع الدموى شد اول غرزة صوَّت

قال للمرضة امسكيه سالته تانى قالى هفك كل الغرز وقالى استحمل بصراحة من شدة الالم اللى انا عايز اخلص منه لقيتنى بقوله ( سوق يا اسطى) ولانه صديقى ضحك وقالى سوق يا سطى مااااشى يا معلم..

الاسطى الدكتور داس بنزين وداس عليا وانا اصوت من الالم لحد ما فك 17 غرزة بدون اى بنج وده اصعب شيء خرجت من تحت ايده وارم نفسيا، طبعا انت مجربتش الورم النفسى.

بعد يومين جه طبيب يغير لى على الجرح لما شفته لقيته بالظبط زى البطيخة الحمرا المشقوقة على شكل هلالين صورتها بالموبايل للذكرى لدرجة ان الدكتور زكى نائب مدير المستشفى لما جه يزورنى وريته صورة الجرح انخض وسالنى مين اللى صورك لما قلت له انا قالى انت فاجر.

بس حس ساعتها ان انا قوى وممكن استحمل الالم الدكتور زكى قالى هبعت لك جراح ينضف لك الجرح من الصديد تخيل يا مؤمن الدكتور يجى بالمشرط ويقطع اللحم الملتحم بالصديد بدون بنج ويقولى استحمل بصراحة ساعتها الموت عندى كان ارحم..

رحت ماسك ايديه بعنف وقلت له كفاية كده لما ادخل العمليات لو هتدبحونى مش هحس انما كده كفااية، ودخلت العمليات بعد أسبوع لتنظيف الجرح وخرجت من المستشفى دون استدعاء اى حد وحجزت قطر وسافرت من القاهرة لدرجة ان فى ناس راحت تزورنى ولما ملقتنيش فكرونى مت لانهم شافو صور الجرح على الموبايل وكان اى حد بيشوفها ميقدرش يكمل.